ជំនួយការរូបនេះ បានប្រាប់ទៀតថា មូលហេតុដែលខាងផលិតកម្មជ្រើសរើសយក ឌុច លីដា មកសម្ដែងព្រោះទម្រង់មុខ រាងស្រទន់ស័ក្ដិសមជាមួយនឹងសាច់រឿង។ សំខាន់ជាងនេះទៅទៀតនោះ គឺតារាស្រីរូបនេះ ហ៊ានថតឈុតលក្ខណៈសិចស៊ី។
អ្នកស្រី បានបន្ថែមទៀតថា៖”នៅក្នុងសាច់រឿងឈុតឆាកសិចស៊ីហ្នឹងមិនមែនជាលក្ខណៈត្រេកត្រអាលអីនោះទេគ្រាន់តែជាបែបធម្មជាតិថតនៅទឹកជ្រោះឃើញតែខ្នងប៉ុណ្ណោះ។ ចំពោះឈុតអាក្រាតកាយហ្នឹង គឺយើងយកតួផ្សេងមកជំនួសគួបផ្សំនឹងការកាត់តបច្ចេកទេសថតផងដែរ”។
ពាក់ព័ន្ធបញ្ហានេះដែរ សាមីខ្លួនបានប្រាប់ Sabay ថារឿងថ្មីដែលរូបនាងបានថតនេះគឺមានលាយឡំនូវភាពសិចស៊ីខ្លះៗប៉ុន្តែអាចទទួលយកបាន៖ “ចាសបងរឿងថ្មីហ្នឹងមានឈុតសិចស៊ីដែរហើយឈុតខ្លះលក្ខណៈអាក្រាតកាយទៀតណាបងប៉ុន្តែត្រូវជំនួសដោយអ្នកផ្សេងគ្រាន់តែដាក់មុខខ្ញុំជំនួសវិញ”។
និយាយពីចំណងជើង ” Uninvited” វិញ ជំនួយការខាងលើបានបកស្រាយផងដែរថាតួស្រី ឌុច លីដា មិនមែនជាតួអង្គមនុស្សទេ គឺជាព្រលឹងមួយដែលមិនមានអ្នកណាអញ្ជើញរូបនាងឲ្យមកចូលមករស់នៅក្នុងភូមិហ្នឹងទេ។ គឺនាងមកដោយខ្លួនឯង ប៉ុន្តែមិនបានបង្កការភ័យខ្លាចដល់អ្នកស្រុកទេ គឺមកដើម្បីជួយឲ្យភូមិស្រុកមានភាពរីកចម្រើន។ ទោះជាយ៉ាងនេះក្ដី អ្នកភូមិនៅតែគិតថា លីដា ជាព្រាយបិសាច និងមនុស្សចង្រៃដដែល។
” Uninvited” គឺប្រភេទរឿងខ្នាតធំមួយក្នុងចំណោម៣ប្រចាំឆ្នាំ ២០១៥ របស់ផលិតកម្ម Rock។ តាមលោក យឹម សុសត្យា ប្រធានគ្រប់គ្រងការផលិតរបស់ Rock រឿងនេះ ជារឿងទី២បន្ទាប់ពី “Before The Fall” និងរឿងទី៣ គឺរឿង “ចេនឡា២”។ លោក ប្រាប់ទៀតថា “Uninvited” បានចាប់ផ្ដើមថតតាំងពីថ្ងៃទី ០៧ មិថុនា គ្រោងនឹងបញ្ចប់នាសប្ដាហ៍ទី១នៃខែកក្កដាខាងមុខនេះ។ ដោយឡែក ថ្ងៃដាក់បញ្ចាំងមិនទាន់ត្រូវបានបញ្ចេញឲ្យដឹងនៅឡើយទេ។ ក្រៅពី ឌុច លីដា រឿងនេះ មានចូលរួមសម្ដែងដោយ សែម ឆវី ភរិយា សាវិន ហ្វីលីព ស៊ីសុវត្ថិ សេរីវុឌ្ឍ អឿ ដារ៉ា សុខ សុធន និងតារាជាច្រើនរូបទៀត៕
Post a Comment